Innskot

Tengsl manns og náttúru og sameiginlegur áhugi Olgu Bergmann og Önnu Hallin á snertiflötum vísinda og lista eru grundvallarstef í verkum þeirra. Þær setja gjarna hefðbundnar flokkanir og túlkanir vísindanna í nýtt samhengi og velta fyrir sér mögulegri birtingarmynd þeirra í framtíðinni í verkum sem svipar til vísindarannsókna en þar sem blandað er saman gefnum staðreyndum, nýrri túlkun og hreinum uppspuna. Rými, staður og samhengi eru líka mikilvægir þættir í öllum verkefnum þeirra. Þær hafa til dæmis unnið sýningar inní og í samtali við fastar sýningar t.d. á náttúrugripasöfnum og á sýningum um mannlíf, náttúru og sögu staða svo eitthvað sé nefnt.

Olga og Anna hafa frá árinu 2005 unnið fjölda verka og verkefna í sameiningu. Um er að ræða myndlistarsýningar heima og erlendis, til dæmis í Listasafni Íslands, Kling og Bang Gallerí, Safnasafninu, í Listasafni Einar Jónssonar og á norræna tvíæringnum Momentum í Moss í Noregi. Auk þess hafa þær unnið verk fyrir opinbert rými bæði tímabundin verk í formi innsetninga innandyra og úti og verk fyrir almenningsrými og opinberar byggingar, sem dæmi má nefna útilistaverk fyrir nýja öryggisfangelsið á Hólmsheiði.

Sýning þeirra “Innskot” sem opnar í Pálshúsi 13. júlí byggir á athugunum þar sem tilfærsla á tíma, staðsetningu og menningu á sér stað og þar sem áður óþekktir
steingervingar og fornleifafundir á Tröllaskaga varpa nýju ljósi á samhengi hlutanna. Í verkinu gætir einnig áhrifa frá vangaveltum um hlutverk 5000 ára gamallra sýrlenskra “augnskurðgoða” eða “Eye Idols” sem fundust við fornleifauppgröft í Tell Brak í Sýrlandi rétt fyrir heimstyrjöldina síðari sem vegna sérkennilegs útlits hafa ýtt undir kenningar um geimverur eða verur úr annarri vídd sem hugsanlegar fyrirmyndir þeirra.

 Innskot  Innskot