TENGINGAR - Listasýning Helgu Pálínu Brynjólfsdóttur

„Textíllistakonan Helga Pálína Brynjólfsdóttir hefur nú um árabil gert tilraunir með að sauma í kletta, litglæða grábrún blæbrigði móbergsins en líka spýtur, nýjar og gamlar. Hún rillar og vefur, holar aftan og stingur framan til að laða fram skúlptúr, línur og horn.

Á sýningunni í Pálshúsi kallar Helga Pálína með þráðum sínum fram nýjar tengingar í spýtum og steinum, hyllir náttúruna og söguna, umbreytir henni og víkkar sýn með indíánskri litadýrð og fíngerðu bróderíi. En sögurnar er víðar, í gömlum myndum og heimildum, sem öðlast annað og nýtt líf.

Fortíðin og framtíðin, hið harða og hið mjúka, hið kvenlæga og hið karllæga, djúp jarðar og húrrandi nútímatækni stíga hér leikandi dans“. (Texti: Jórunn Sigurðardóttir)

 

Helga Pálína Brynjólfsdóttir útskrifaðist úr textíldeild UIAH, Listiðnaðaháskólanum í Helsinki Finnlandi (nú Aalto University) árið 1988 og hafði áður lokið B.Ed prófi frá Kennaraháskóla Íslands. Hún vinnur að margvíslegum textílverkum og bókverkum og hefur tekið þátt í fjölmörgum sýningum hér heima og erlendis.

Helga Pálína hefur aðallega einbeitt sér að textílþrykki en sýnir nú mestmegnis verk unnin í tré og móberg sem hún saumar eða vindur með hör- og silkiþræði. Trékubbarnir eru afsag af pallaefni sem forðað var úr eldiviðarkörfu og gefið nýtt líf. Móberg finnst mjög víða um land, en það er viðkvæmt og brothætt efni. Mörg verkin hafa vísun í vorið, þegar litur og líf skríður út úr gráma vetrarins.


Frá árinu 1989 hefur Helga Pálína kennt textílþrykk í Hönnunar- og arkitektúrdeild Listaháskóla Íslands, við Textíldeild Myndlistaskólans í Reykjavík og í Textíldeild Myndlista-og handíðaskóla Íslands.

Helga Pálína 1Helga Pálína 2Helga Pálína 3